ପୁଣି ଲାଗିଲା ଖାକିରେ କଳଙ୍କର ଛିଟା, ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡିଲେ ପୋଲିସ ଏ.ଏସ୍‌.ଆଇ

ଭବାନୀପାଟଣା,/ଥୁଆମୂଳ ରାମପୁର -: ପୁଣି ଖାକିରେ କଳଙ୍କର ଛିଟା ।୬ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡିଲେ ଥୁଆମୂଳ ରାମପୁର ଥାନାର ଏ.ଏସ୍‌.ଆଇ ରମେଶ ଚନ୍ଦ୍ର ପଟ୍ଟନାୟକ ।ମଙ୍ଗଳବାର ଭିଜିଲାନ୍ସ ଭବାନୀପାଟଣା ବସ୍ ଷ୍ଟାଣ୍ଡ ଠାରେ ଲାଲ୍ ହାତରେ ଏ.ଏସ୍‌.ଆଇ ଶ୍ରୀ ପଟ୍ଟନାୟକଙ୍କୁ ଧରିଛି ।

ଗତ ୧୫ ତାରିଖରେ ଲୋହରାଯୋର୍ ଗ୍ରାମର ପବିତ୍ର ନାଏକ ଘରକୁ ଯାଇ ତୁ ଭାଟି ମଦ ନ ବିକି ହାତରନ୍ଧା ମଦ କାହିଁକି ବିକ୍ରି କରୁଛୁ ବୋଲି ପବିତ୍ରକୁ କହିଥିଲେ ।ଏବଂ ପବିତ୍ରର ଘରେ ଥିବା ମଦ ଜବତ କରିଥିଲେ ।କାଲିକି ଥାନାକୁ ଆସିବାକୁ କହିଥିଲେ ।ଏ.ଏସ୍‌.ଆଇ ଶ୍ରୀ ପଟ୍ଟନାୟକଙ୍କ କହିବା ଅନୁଯାୟୀ ପବିତ୍ର ୧୬ ତାରିଖ ଦିନ ଥାନାକୁ ଆସିଥିଲା ।

ସେଠାରୁ ଏ.ଏସ୍‌.ଆଇ ଶ୍ରୀ ପଟ୍ଟନାୟକ ତାଙ୍କ ଘରକୁ ଡାକିନେଇଥିଲେ ।ଏବଂ ସେଠାରେ ଏହି ଘଟଣାକୁ ରଫାଦଫା କରିବା ପାଇଁ ୭ ହଜାର ଟଙ୍କା ଦେବାକୁ କହିଥିଲେ ।ପବିତ୍ର ୭ହଜାର ଟଙ୍କା ଦେବାରେ ସକ୍ଷମ ନଥିବା କଥା ପ୍ରକାଶ କରିଥିଲା ।ପରେ ୬ ହଜାର ଟଙ୍କା ଦେବାକୁ ପବିତ୍ର କୁ କହିଥିଲେ ଏ.ଏସ୍‌.ଆଇ ଜଣକ ।ମୋତେ ପୌର ନିର୍ବାଚନ ପାଇଁ ଭବାନୀପାଟଣା ଡ୍ୟୁଟି ପଡିଛି ତୁ ମଙ୍ଗଳବାର ଭବାନୀପାଟଣା ଆସି ମୋତେ ୬ହଜାର ଟଙ୍କା ଦେବୁ ବୋଲି ପବିତ୍ରକୁ କହିଥିଲେ ।ଏହାପରେ ପବିତ୍ର ଏହି ଲାଞ୍ଚ ସମ୍ବନ୍ଧୀୟ ଘଟଣା ନେଇ ଭିଜିଲାନ୍ସ ସହିତ ଯୋଗାଯୋଗ କରିଥିଲା ।ଭବାନୀପାଟଣା ବସ୍ ଷ୍ଟାଣ୍ଡରେ ପବିତ୍ର ନାଏକ ଏ.ଏସ୍‌.ଆଇ ରମେଶ ଚନ୍ଦ୍ର ପଟ୍ଟନାୟକଙ୍କୁ ୬ହଜାର ଟଙ୍କା ଲାଞ୍ଚ ଦେଉଥିବା ବେଳେ ପୁର୍ବରୁ ଛକି ବସିଥିବା ଭିଜିଲାନ୍ସ ଟିମ୍ ଏ.ଏସ୍‌.ଆଇ ପଟ୍ଟନାୟକଙ୍କୁ ଲାଲ୍ ହାତରେ ଧରି ଅଟକ ରଖିଛି ।ବର୍ତ୍ତମାନ ଏ.ଏସ୍‌.ଆଇ ଶ୍ରୀ ପଟ୍ଟନାୟକଙ୍କ ଭବାନୀପାଟଣା ସହରର ରାମସାଗର ପଡାରେ ଥିବା ନିଜ ବାସଭବନକୁ ଭିଜିଲାନ୍ସ ବିଭାଗ ତଲାସୀ ଚଳାଇଛି ।
ମଙ୍ଗଳବାର ଏହି ଚଢ଼ାଉରେ କଳାହାଣ୍ଡି ଭିଜିଲାନ୍ସ ଡିଏସ୍ପି ସଦାନନ୍ଦ ପାଣିଙ୍କ ନେତୃତ୍ୱର ଉଭୟ କଳାହାଣ୍ଡି ଓ ନୂଆପଡା ଭିଜିଲାନ୍ସ ପକ୍ଷରୁ ଇନ୍ସପେକ୍ଟର ପ୍ରମିଳା ସୁନା,ଏ.ଏସ୍‌.ଆଇ ସରୋଜ ବେହେରା,ଏ.ଏସ୍‌.ଆଇ ବିଦ୍ୟାଧର ବେହେରା ଏବଂ କନଷ୍ଟେବଲ ରାଜେଶ ନାଏକଙ୍କ ଟିମ୍ ଏହି କାର୍ଯ୍ୟରେ ନିୟୋଜିତ ଥିଲେ ।
ଏଠାରେ ସୂଚନାଯୋଗ୍ୟ ଯେ ଗତ ୧/୭/୨୦୨୦ ତାରିଖରେ କଳାହାଣ୍ଡି ଜିଲ୍ଲା ଆମପାଣି ଥାନାରେ ସେହି ସମୟରେ କାର୍ଯ୍ୟରତ ଥିବା ଏ.ଏ୍‌ସ.ଆଇ ପଟ୍ଟନାୟକଙ୍କ ନାମରେ ଅଭିଯୋଗ ହୋଇଥିଲା ।ଯାହାକୁ ନେଇ କଳାହାଣ୍ଡି ଏସ୍‌ପିଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଥିଲା ।ଅଭିଯୋଗ ସତ ପ୍ରମାଣ ହେବାପରେ ସମ୍ପୃକ୍ତ ପୋଲିସ ଏଏସ୍‌ଆଇ ରମେଶ ପଟ୍ଟନାୟକଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଥିଲା । ଆମପାଣି ଥାନାରେ ଜମିବାଡ଼ି ସଂକ୍ରାନ୍ତରେ ଏକ ମାମଲା ରୁଜୁ ହୋଇଥିଲା ।ଏହି ମାମଲାକୁ ନେଇ ସମ୍ପୃକ୍ତ ଅଭିଯୋଗ କାରୀଙ୍କ ନିକଟକୁ ମୋ ସରକାରରୁ ଫୋନ ଆସିଥିଲା । ବ୍ୟକ୍ତି ଜଣକ ମାମଲା ରଫାଦଫା ପାଇଁ ଏଏସ୍‌ଆଇ ଲାଞ୍ଚ ମାଗିଥିଲେ ବୋଲି ଅଭିଯୋଗ ହୋଇଥିଲା । ଏବେ ଏହି ଅଫିସରକୁ ନେଇ ସୁବୁଠି ଗୋଟିଏ ଚର୍ଚ୍ଚା ସେ ବଡ ଖାଉଟିଆ ଥିଲା, ଗରିବ ଗୁରୁବାଙ୍କୁ ବି ଛାଡୁନଥିଲା ତଣ୍ଟି ମୁଣ୍ଡାକୁ ଧରି ପକାଉଥିଲା ।