୭୬ ବର୍ଷ ବୟସରେ ତୃତୀୟ ବିବାହ କଲେ ଏହି ପୂର୍ବତନ ରାଷ୍ଟ୍ରପତି …

ନୂଆଦିଲ୍ଲୀ -: ବିବାହ ପାଇଁ କୌଣସି ବୟସ ନଥାଏ । ଏହି କଥାକୁ ଭୁଲ ପ୍ରମାଣିତ କରିଛନ୍ତି ବ୍ରାଜିଲର ପୂର୍ବତନ ରାଷ୍ଟ୍ରପତି । ବ୍ରାଜିଲର ପୂର୍ବତନ ରାଷ୍ଟ୍ରପତି ଲୁଇଜ ଇନସିଓ ଲୁଲା ଡିସିଲଭା ୭୬ ବର୍ଷ ବୟସରେ ୫୫ ବର୍ଷୀୟ ରୋଜାଙ୍ଗେଲା ସିଲଭାଙ୍କୁ ବିବାହ କରିଛନ୍ତି । ରୋଜାଙ୍ଗେଲା ଜଣେ ସମାଜସେବୀ ହୋଇଥିବାବେଳେ ଏହି ଅବସରରେ ଏକ ବଡ଼ ପାର୍ଟିର ଆୟୋଜନ କରାଯାଇଥିଲା । ଏହି ବିବାହ କାର୍ଯ୍ୟକ୍ରମରେ ଲୁଇଜଙ୍କ ବହୁ ସମର୍ଥକ, ରାଜନେତା ଏବଂ କଳାକାର ଉପସ୍ଥିତ ଥିଲେ । ବିବାହ ଉତ୍ସବରେ ଗ୍ରାମୀ ପୁରସ୍କାର ବିଜେତା ଗିଲବର୍ଟୋ ଗିଲ ମଧ୍ୟ ଉପସ୍ଥିତ ଥିଲେ । ସୂଚନାଯୋଗ୍ୟ ଯେ ଅକ୍ଟୋବରରେ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ​​ଲୁଲା ନେତୃତ୍ୱ ନେଉଛନ୍ତି ।

ଏହି ବିବାହକୁ ନିର୍ବାଚନ ସହିତ ଯୋଡି ମଧ୍ୟ ଦେଖାଯାଉଛି । ଖବର ଅନୁଯାୟୀ, ଯେଉଁଠାରେ ବିବାହ ହୋଇଥିଲା ସେହି ସ୍ଥାନ ବିଷୟରେ କାହାରି ପାଖରେ କୌଣସି ସୂଚନା ନଥିଲା । କୁହାଯାଉଛି ଯେ ବର୍ତ୍ତମାନର ରାଷ୍ଟ୍ରପତି ଜାୟର ବୋଲସନାରୋଙ୍କ ସମର୍ଥକଙ୍କ ବିରୋଧର ଭୟ ଯୋଗୁଁ ବିବାହର ସ୍ଥାନ ଗୁପ୍ତ ରଖାଯାଇଥିଲା । ବୁଧବାର ଅପରାହ୍ନ ପର୍ଯ୍ୟନ୍ତ ଲୁଲା ମଧ୍ୟ ତାଙ୍କ ନିର୍ଦ୍ଧାରିତ କାର୍ଯ୍ୟକ୍ରମରେ ଯୋଗ ଦେଇଥିଲେ । ତା’ପରେ ରାତିରେ ସେ ତାଙ୍କ ଅଫିସିଆଲ୍ ଇନଷ୍ଟାଗ୍ରାମରେ ଏକ ଚିତ୍ର ପୋଷ୍ଟ କରିଥିଲେ, ଯେଉଁଥିରେ ସେ ରୋଜାଙ୍ଗେଲା ସିଲଭାଙ୍କୁ ମୁଦି ପିନ୍ଧାଇଥିବାର ନଜର ଆସିଛନ୍ତି ।

ସୂଚନା ମୁତାବକ ଏହା ହେଉଛି ଲୁଲାଙ୍କର ତୃତୀୟ ବିବାହ । ତାଙ୍କର ପ୍ରଥମ ବିବାହ ମାରିଆ ଡି ଲୋର୍ଡେନ୍ସ ଡି ସିଲଭାଙ୍କ ସହିତ ହୋଇଥିଲା, ଯାହାଙ୍କର ଦୁଇ ବର୍ଷ ପରେ ମୃତ୍ୟୁ ହୋଇଯାଇଥିଲା । ତା’ପରେ ସେ ଲୁଲା ମାରିସ୍ ଲେଟିସିଆଙ୍କୁ ବିବାହ କରିଥିଲେ । ତାଙ୍କର ଦ୍ୱିତୀୟ ପତ୍ନୀଙ୍କର ଚାରି ସନ୍ତାନ ଥିଲେ । ୨୦୧୭ ମସିହାରେ ହୃଦଘାତରେ ମାରିସଙ୍କର ମୃତ୍ୟୁ ହୋଇଥିଲା । ଏହା ପରେ ସେ ରୋଜାଙ୍ଗେଲା ସିଲଭାଙ୍କ ନିକଟତର ହୋଇଥିଲେ । ଆଉ ଏହି ସମୟରେ ସେ ଦୁର୍ନୀତି ଅଭିଯୋଗରେ ଜେଲରେ ଥିଲେ । ପରେ ତାଙ୍କୁ ବ୍ରାଜିଲର ସୁପ୍ରିମକୋର୍ଟ ମୁକ୍ତ କରିଥିଲେ ।