କଟକ -:
ଏଭଳି ବ୍ୟାଚ୍ର ଔଷଧ ତିଆରି କରିନି ବୋଲି ଗ୍ଲେନ୍ମାର୍କ କମ୍ପାନି ଲିଖିତ ଭାବେ ସ୍ପଷ୍ଟ କରିବାପରେ କଟକ ଜିଲ୍ଲା ଡ୍ରଗ୍ସ ଇନ୍ସପେକ୍ଟର୍ ମାଣିକୋଷ ବଜାରସ୍ଥିତ ଭି.ଆର୍ ଡ୍ରଗ୍ ଏଜେନ୍ସି ଓ ଯାଉଁଳିଆପଟିସ୍ଥିତ ପୂଜା ଏଣ୍ଟରପ୍ରାଇଜେସ୍ର ୪ଜଣଙ୍କ ନାମରେ ପୁରୀଘାଟ ଥାନାରେ ଏତଲା ଦେଇଛନ୍ତି। ଭି.ଆର୍ ଡ୍ରଗ୍ ଏଜେନ୍ସିର ମାଲିକ ବର୍ଷାରାଣୀ କ୍ୟାଲ୍ ଓ ତାଙ୍କ ପୁଅ ରାହୁଲ କୁମାର କ୍ୟାଲ୍ଙ୍କ ନାମରେ ମାମଲା ରୁଜୁ ହୋଇଥିବା ବେଳେ ଯାଉଁଳିଆପଟି ପୂଜା ଏଣ୍ଟର୍ପ୍ରାଇଜେସ୍ର ମାଲିକ ସଞ୍ଜୟ ଜଲାନ୍ ଓ ତାଙ୍କ ପତ୍ନୀ ଚଞ୍ଚଲ ଜଲାନ୍ଙ୍କ ନାମରେ ପୁରୀଘାଟ ଥାନା ପୁଲିସ ମାମଲା ରୁଜୁ କରିଛି।
ଉଭୟ ଏଜେନ୍ସିଙ୍କ ନିକଟରୁ ୨ ଲକ୍ଷ ୩ ହଜାର ୪୦୦ ଟେଲ୍ମା-୪୦ ଓ ୪୬ ହଜାର ୩୫୦ ଟେଲ୍ମା ଏଏମ୍ ବଟିକା ଜବତ୍ କରାଯାଇଥିବା କଟକ ଜିଲ୍ଲା ଆସିଷ୍ଟାଣ୍ଟ ଡ୍ରଗ୍ସ କଣ୍ଟ୍ରୋଲର୍ ଧର୍ମଦେବ ପୁହାଣ ସୂଚନା ଦେଇଛନ୍ତି। ଅନ୍ୟପଟେ ମାମଲା ରୁଜୁ ହୋଇଥିବା ସମସ୍ତ ବ୍ୟବସାୟୀ ଫେରାର୍ ଥିବାରୁ ପୁଲିସ ସେମାନଙ୍କୁ ଗିରଫ କରିପାରିନି। ଉଲ୍ଲେଖଯୋଗ୍ୟ ଯେ ନକଲି ଔଷଧ ଅଭିଯୋଗ ପରେ ଗତ ୬ ତାରିଖରୁ ତିନିଦିନ ଧରି ଚଢଉ ଜାରି ରହିଥିଲା।
